Zaïko Langa Langa

Payaɣ Zaïko Langa Langa ɖɔɖɔ se Zaiko Langa Langa Nkolo Mboka. Pɩtɛna ɛyʊ nɔɔyʊ hɩɖɛ ɛlɛ pɩkɛna hendu teyaa ŋgbɛyɛ naɖɩyɛ. Palɩza-ɖɩ pɩnaɣ 1969 kɛ Kɔŋgo Kinsasa ɛjaɖɛ taa alɩwaatʊ ndʊ payawaɣ Sayiri ɖɔɖɔ se Koŋgo yɔ. Pɩnzɩ 1970 taa kpem kɛ ŋgbɛyɛ ɖɩnɛ ɖɩtɛ miŋ taa nɛ hendu teya sɔsɔ sɔsɔ kaawɛ ɖɩ-taa. Pa-taa kɔyɔ: Papa Wemba, Pépé Felly, Evoloko Jocker, Jossart N'yoka Longo, Bimi Ombalé. Pɩtasɩ ɖɔɖɔ lɛ, hendu teu aŋgba ndɩ ndɩ ñɔɔ ɖɩ-yɔɔ yɔɔ. Aŋgba ana a-taa kɔyɔ: Isifi Lokole (en), Yoka Lokole, Langa Langa Stars, Choc Stars, Le Grand Zaiko Wawa, Quartier Latin International, Viva La Musica.

Zaïko tɔbʊʊ nɛ Liŋgala kʋnʋŋ taa kɛlɛ se: Sayiri ɛjaɖɛ caanaʊ taa mba. Langa Langa ñɛkɛna Ekuwatɛɛrɩ hɔɔlʊ taa samaɣ nakayɩ. Paanɛ pɩnzɩ 1980 taa ɖama kɩɩnɩnaʊ ɛɛsʊ ŋgbɛyɛ ɖɩnɛ ɖɩ-taa nɛ paya ɖama yɔ, Zaïko payɛ yaa ɖɩ-wɛtʊ wɛɛ paa-anɩ ɛ-calɩm taa. Kpaɣ pɩnzɩ 1980 nɛ 1988 taa Zaiko Langa Langa lɩza tatasɩ sakɩyɛ: Non Stop, Tala modèle échanger, Hé Ngoss, Bongama Kamata position, On gagne le procès, Nippon Banzai. Pɩnaɣ 1986 taa alɩwaatʊ ndʊ Zaiko Langa Langa kaawoba Zaapɔŋ taa kɛ palɩza tata ŋga payaɣ se Nippon Banzai yɔ.

Pʊcɔ nɛ ŋgbɛyɛ ɖɩnɛ ɖɩcɩɩ yeli lɛ, ɖɩlɩza tataɣ nakayɩ kɛ pɩnaɣ 1987 nɛ payaa-kɛ se Subissez les Conséquences, pʊtɔbʊʊ se, mbʊ ŋɖʊ yɔ ŋgʊŋ-pʊ kɛɛkɛɛ. Pɩnaɣ 1988 kɛ ŋgbɛyɛ ɖɩnɛ ɖɩyaa pɩlɩɩna Nyoka Longo nɛ Lengi Lenga pa-ɖama kɩɩnɩnaʊ yɔɔ. Pataa paa-anɩ ɛñɩnaɣ se ɛnʊ ɛkɛŋna ɖɩ-ñʊʊdʊ. Pa-kpaagbaɣ tataɣ kɔyɔ Poison pʊtɔbʊʊ se kʊdɔŋ. Lɔŋsɩnɖʊ nɔɔyʊ ñama ŋgbɛyɛ ɖɩnɛ ɖɩ-yɔɔ kɛ tɔm se: Zaïko Langa Langa kɛna ŋgbɛyɛ nɖɩ ɖɩsɔɔla tʊmɩyɛ kɩpanɖɛ labʊ camɩyɛ yɔ.