Cɔtʊʊ

Pɩlɩɩna Wikipediya
Halaa cɔtʋʋ wondu pɔɔ taa, Kamerun

Ɛyʊ lɩzɩɣʊ asuluma naayɛ wonuu nakʊyʊ yɔɔ yɔ payaɣ se cɔtʊʊ. Lɩm nɛ fɔɔfɔɔ palɩzɩɣna asuluma ana. Ɖooo lɛ atɛya pɔcɔtaɣna. Ɛbɛ payaɣ se atɛya ? Kpɩzɩyɛ yaɣ lɛ, palɩzɩ ɖɩ-taa kpiziwe nɛ pɔtɔɔ nɛ pɔlɔ kɔtɔŋ pɔɔyasɩ. Mbʊ puhuzi kpiziwe yɔɔ yɔ payaɣ se atɛya. Ɛzɩma pɔcɔtʊʊna atɛya ? Pɔsɔkɩ-yɛ sɔɔyɛ taa yɔbɩ yɔbɩ yaa pakpatɩɣ-yɛ kɩkpatʊ kaaʊ yɔɔ kpɔyɩ kpɔyɩ. Pʊwayɩ lɛ, pokuu mbʊ pakpataa yɔ nɛ paɖʊ ñanaɣ taa. Paɖʊ lɩm pʊ-yɔɔ pɩmaɣna nɛ pakpaɣ wonuu ŋgʊ pacaɣ cɔtʊʊ yɔ nɛ paɖʊ atɛya lɩm mbʊ pɩ-taa. Paa asuluma ɛɛwɛ ɛzɩma wonuu ŋgʊ kʊ-yɔɔ kɔyɔ, alɩɣ a-tɩŋa payɩ. Sɔnɔ piya ɛɛsɩŋ se atɛya kɛ fɔɔfɔɔ kɩbaŋgʊ siŋŋ. Lɛɛlɛyɔ, anasaayɩ fɔɔfɔɔnaa lɩ ndɩ ndɩ nɛ pɔcɔtʊʊna wondu. Kabɩyɛ tʊ sɩma ɖɔɖɔ fɔɔfɔɔnaa nabɛyɛ labʊ. Ɛsa nakʊyʊ nɛ payaa-kʊ se kabɩyɛ fɔɔfɔɔ. Kɩwɛ ɖeu pɩdɩɩfɛyɩ kɔzɩ kɔzɩ lɩm sɔʊ taa. Kɩlɩzɩɣ ɛyʊ tomnaɣ yɔɔ kʊdɔmɩŋ nɩɩyɛ. Kɩlɛzɩɣ ɖɔɖɔ ɛyʊ tomnaɣ yɔɔ lɛzɛ lɛzɛ. Ɖooo lɛ pɔɔ taa ɛyʊ tiki nɛ ɛcɔtɩ, kɔzɩ kɔzɩ yolim taa. Ɛlɛ, ɛyʊ kɔma ɛtɩlɩ se fɔɔfɔɔ huluu yeki nɛ lɩm sɔʊ. Mbʊ yebina nɛ lɛɛlɛyɔ hila taa lɩm fɛyɩ. Lɛɛlɛyɔ, poyuyi lɔkɔnaa cikpeme nɛ sɔsaa. Lɔkɔnaa sɔsaa payaɣ se fɔɔraazɩ waa. Paatazɩɣ cɔtʊʊ lɔkɔnaa mba pɔ-cɔlɔ. Weyi ɛcaɣ cɔtʊʊ yɔ, elu lɩm nɛ ekpena ɛ-saʊ taa nɛ ɛcɔtɩ.

Séchage de lessive

Ɖooo lɛ, nesi ɖeke pɔcɔtʊʊna. Lɛɛlɛyɔ, anasaayɩ ñɩɣtʊ ndɩ ndɩ lɩwa nɛ tɩcɔtʊʊ wondu ɖɔɖɔ. Anasaayɩ ñɩɣtʊ natʊyʊ cɔtʊʊ paaɖʊʊ lɩm. Pʊ-tɔbʊʊ se tɩtɛŋ cɔtʊʊ kpa mbʊ yɔ, ɛyʊ pɩzɩɣ esuu wonuu ŋgʊ anasaayɩ ñɩɣyʊʊ cɔtaa yɔ kpaakpaa, ɛɛɖaŋɩɣ se pɩwɩlɩ nɛ pʊcɔ mbʊ yɔ lɩm fɛyɩ kʊ-yɔɔ.

ñɩɣtʊ ndʋ pɔcɔtʊʊ yɔ