Aleɣya (Jeu)

Pɩlɩɩna Wikipediya

Aleɣya kɛna ɛyʋ tomnaɣ taa leleŋ n̄ɩnʋʋ lakasɩ tʋmɩyɛ. Aleɣya wɛna tɔbɩŋ nɩʋ ndɩ ndɩ. Papɩzɩɣ pɔtɔ size aleɣya kɛna tʋmɩyɛ nɖɩ palakɩ-ɖɩ tomnaɣ taa nɛ n̄ʋʋ maɣzɩm taa yɔ.


Aleɣya nɩɣ ɛyʋ tomnaɣ pɩŋŋ. Akɛdɩɣna ɛyʋ pɩŋŋ atɛ awɩzɩ ɖɔɖɔ pɩŋŋ. Tɔbʋʋ se weyi pawakɩ-ɩ aleɣya taa yɔ, ɛ-taa ɛɛlakɩ leleŋ, pɩwɩzɩ-ɩ kɩwɩzʋ. Piyele weyi ɛlɛ waba aleɣya ana a-taa yɔ, ɛlɛ taa yɔ, pɩkɛdɩnɩ ɛlɛ kɩkɛdɩnaʋ. Ɛyaa naalɛ pɩzɩɣ pala aleɣya. Ɛyʋ kʋɖʋm koŋ pɩzɩɣ ɖɔɖɔ ɛla aleɣya pɩlɩɩna mbʋ ɛñɩnɩɣ yɔ pʋ-yɔɔ.


Paa aleɣya wena a-taa lɛ, waɖaa wɛɛ nɛ lesiyaa ɖɔɖɔ n̄ɛwɛɛ. Aleɣya wɛ leleŋ kamaɣ fɛyɩ. Aɖʋ hʋnʋm ɛyʋ tomnaɣ. Ahɛdɩɣ ɛyʋ fiteɣnim taa camɩyɛ kpayɩ kpayɩ. Akɔŋna waɖʋ laŋhʋlʋmɩyɛ nɛ taa leleŋ. Ɛlɛ, ɛyʋ kaɖɩɣ ɛ-taa siŋŋ nɛ pʋcɔ ɛpɩzɩ ɛla aleɣya naayɛ.


Toovenum lɛ, pʋcɔ ɛyʋ ɖʋ ɛ-taa size ɛlakɩ aleɣya naayɛ lɛ, pʋwɛɛ size, ɛɖʋ ɛ-ñʋʋ taa size ɛpɩzɩ elesi, tɔbʋʋ se papɩzɩ pawabɩ-ɩ aleɣya ana a-taa. Paa mbʋʋ yɔ, aleɣya laɖʋ ɛɛtɔŋ ɛ-tɩ size ewoki lesuu yaa ewoki se pawabɩ-ɩ nɛ pʋcɔ ewolo. Nabʋyʋ taa kɔyɔ, aleɣya yeki nɛ ɛyʋ lesi e-hoɖe nɛ ɛ-n̄ɩm caɣcaɣ, ɛlɛ etehiɣ pʋyʋ yaa pɩtawazɩ-ɩ pʋyʋ.


Nabɛyɩ ñalakɩ aleɣya size panɩɩ leleŋ kɩnɩʋ. Paa pawabɩ-wɛ, ŋhiŋŋ piihehiɣ-wɛ natʋyʋ. Mbʋ yɔ, aleɣya haɣ woŋga, akɔŋna taa leleŋ. Lɛlaa ñalakɩ size pehiɣ kɛzɛɣa nakɛyɛ aleɣya ana a-taa. Paba ñekpiɖiɣna alɩwaatʋ ndʋ pawakɩ-wɛ yɔ. Halɩ nabɛyɛ ñatʋlʋʋ nɔsɩ peyeki. Ɛyʋ tɩlɩtʋ ñɩnɩyaa, filozɔɔfʋ waa ñɔtɔ size aleɣya kɛ tɔm sɔsɔtʋ siŋŋ kedeŋa yɔɔ n̄ɩma.